Girjjealmodibme: Samiske kvinner og samfunnsdeltakelse
Buorisboahtem girjjealmodibmáj guovvamáno 6.bve. kl.13.30, Árranin, auditåvrån, Ájluovtan. Alomdibme aj streamiduvvá Youtube:n dánna: https://www.youtube.com/watch?v=nQ7UKYPZky8. Guovvamáno gudát biejve jagen 1917 oattjoj Elsa Laula Renberg ja ietjá sáme nissuna sámijt tjåhkanittjat vuostasj sámepolitihkalasj rijkkatjåhkanibmáj Roandemin. Guovvamáno gudát biejve dán jage, 106 jage maŋŋel, bivddip girjjealmodibmáj, ij Elsa Laula Renberga birra, valla ietjá sámenissunjuohkusa birra mij vuorjját gullu, – julevsáme nissunij birra.
Girjijn Samiske kvinner og samfunnsdeltakelse – en studie av lulesamiske kvinners medborgerskap åvddånbuktá girjjetjálle Harrieth Aira båhtusijt suv guoradallamis sáme nissunhiståvrås, sierraláhkáj nuppát væráltdoaro maŋŋel.
Mijá bargge, Harrieth Aira seniorrádevadde/dávvertjoahkke fáhkajådediddje Árran Julevsáme guovdátjin, la 2016 rájes 2022 rádjáj guoradallam Divtasvuona julevsámenissunij viesátguojmmevuodav, mij dálla girjjen almoduvvá Orkana Akademisk girjjealmmudagán.
– Mij ep bárep diede sámenissunij histåvrås. Ij gávnnu sierra girjje mij la guoradallam sámenissunij histåvråv, ja dan diehti ij ga avta sáme unneplågo nissunjuohkusa birra dagu julevsáme nissuna, javllá Aira.
Politihkka ja dássádus
Gájkajda galggá sæmmi máhttelisvuohta berustahtek sjiervij, politihkalasj oassálasstemij ja politihkalasj vájkkudibmáj. Dat la akta ájnnasamos gájbbádusájs demokratidjan ja le demokratija vuodo ja gievrrudahka (juolgge). Demokratidja sáme sebrudagán vierttij aj dav sæmmi spiedjildit.
Valla diehtep gus nuohkásit gåktu dássádus doajmmá julevsáme sebrudagán politihkan ja sebrudakiellemin? Littji gus dássádushásstalusá vaj li gus julevsáme nissuna nuohkásit válljiduvvam åvdåstittjat politihkan ja sebrudakiellemin dagu álmmukválljiduvvam ájrrasin, politihkalasj jådediddjen ja oassálassten sámepolitihka ja bájkálasj politihkalasj arienájn. Le gus demokratidja buoragit bærrájgåtsedum? Ja gåktu l åvddål læhkám?
Jus sidá ienebuv dáj birra diehtet, boade girjjealmodibmáj.
Harrieth Aira giehttu girje birra ja dån besa vehi oahpástuvvat soames dutkambåhtusijda girjen.
– Girjje buktá ådå diedojt sjiervij birra sáme sebrudagán, ja åvddånbuktá dutkambåhtusijt mij åvddål ij la guoradaláduvvam. Mån doajvov girjje båktå árvvalimijt ja ságastallamijt julevsáme nissunij sadjáj politihkan ja sebrudakiellemin ietjama sebrudagán, javllá Aira.
Harrieth Aira la Svenjunjás Divtasvuonan, ja sujna l oajvvefáhka stáhtadiehtagin. Sån la almodam moadda tjállusijt duola dagu sáme duoje birra, sáme nissunhiståvrå birra ja árbbedábálasj máhtudahka tjoaggempráksisij baktu. Åvddål la sån aj journalisstan ja almulasj háldadimen barggam ja barggam sáme oahppoplánaj ja oahpponævoj. Sån la aj jårggålam måttijt tevstajt, oahpponævojt, plakáhtajt ja girjijt julevsámegiellaj.
Girjjealmodibme l oasse sámeálmmuk biejve ávvudallamis Árranin.
Biebmo ja káffa/gáhko vuobdeduvvi, ja Árranin la sierra prográmma ålles barggobiejve.
Gehtja prográmmav: Sámealmmuk biejvve 2023 Árrana prográmma
Vájmulasj buorisboahtem gájkajda girjjealmodibmáj ja ávvudalátjit sámeálmmuk biejvev mijá siegen.
Girjev oastá Árrana næhttaoassásin: NÅ TIL SALGS I BUTIKK OG NETTBUTIKKEN VÅR : SAMISKE KVINNER OG SAMFUNNSDELTAGELSE
Ienep diedo girje birra:
tlf. 90 10 23 19/99 04 73 56
