Sáme nissuna

Prosjækta «Sáme nissuna» la oasse Árrana duoastim-ja guoradallambargos mijá jágegávdan mijá guovlojn.

Sáme nissuna

Sámedigge ja Nordlánda fylkasuohkan juollodin rudájt álgadittjat prosjevtav 2016, ja prosjækta vibáj 2018 gæhtjáj. Maŋŋel 2018 la Árran joarkkám barggat prosjevtajn. 

  

Prosjevtá duogásj:

Sáme nissunij roalla, sadje/dille ja doajmma bæjválattjat ja sebrudakbargon mijá guovlojn ij la bárep tjielggiduvvam, ij ga almoduvvam sierra tiebmán. Gåktu l sáme nissunij sebrudakoassálasstem læhkám, ja gåktu l dat uddni? Majt diehtep mij, ja majt vierttip ienebuv guoradallat? 

Sivva manen dáv guoradallat le gå: 

  • Ij gávnnu aktisasj nissunhiståvrålasj tjálos sáme nissunij birra ja sáme nissunij birra sierraláhkáj mijá guovlojn. 
  • Bájkálattjat ij la sáme nissunij dille bárep guoradaláduvvam mij buohtastahttá sáme nissunijt genga sáme guovlojs. 
  • Sebrudakdiedalasj guoradallama ma sierraláhkáj sáme nissunij árggabiejvev ja sebrudakoassálasstemav guoradallá udnásj Nordlánda sebrudagán ij gávnnu. 

Mij la dagádum?

Prosjevtan li ságájdahttema moadda sáme nissunij tjadáduvvam moattes guovlos Nordlándan. Maŋŋel prosjæktaájge li duodde ságájdahttema tjadáduvvam. Dá ságájdahttema li goappátjagá ságájdahttema ma tjieŋodahtti, madin ietjá vaj sierra tiemájt guosski. 

Prosjækta l aj guoradallam ibnnusijt d.d duodjesiebre Julevsáme duodje ibnnusav mij vatteduváj Árranij gå siebrre hiejteduváj 2014. Duodden li ietjá ibnnusa ja tjállusa, ja aj ietjá dutkij guoradallambargo tjadáduvvam.

Ma sjattatji båhtusa dát duodastimprosjevtas? 

Árran la dárkkelit barggam guovtij tiemáj: 

  1. Vuostasj guoradallá Julevsáme nissunij sebrudakoassálasstemav ja viesátguojmmevuodav
  2. Nubbe gåvvit muhtem Sáme nissunijt Nordlándan.  

Prosjækta Julevsáme nissunij sebrudakoassálasstem guoradallá julevsáme nissunij sebrudakoassálasstemav Divtasvuonan, åvddål ja sierraláhkáj maŋŋel 1980. Ja sijá dille buohtastahteduvvá sáme nissun ietjá sáme guovlojn. 

Båhtusa dát oases gaskostuvvá sierra tjállusin/girjjen mij ruvva almoduvvá.

Prosjevtan Sáme nissungåvå Nordlándan la duodastimoasse tjadáduvvam. Báhtsám la gaskostit, mij jáhkedahtte sierra podkásstan, tjállusij ja semináraj dagáduvvá jahtedahtte jagen 2024. 

 

Árran/Päivi Alanen