4. Árran Julevsáme guovdátja vuododusá njuolgadusá

§ 1 Ulmme

«Árran  - julevsáme guovdásj / lulesamisk senter» le vuododus ásaduvvam Stáhtas Suohkandepartementa baktu, Nordlánda fylkasuohkanis ja Divtasvuona suohkanis. Vuododus mierreduvvá háldadus njuolgadusájs, dáj vuolen aj dárkastusáj ja revisjåvnåj njuolgadusájs, ma åvddånbåhti vuodoslágas. Vuodos máhttá oajvvevuododussan doajmmat.

Vuododusá ulmmen le Árranav æjggut ja dåjmadit nasjonálalasj sáme institusjåvnnån sihkardittjat, åvddånahtátjit ja joarkátjit julevsáme kultuvrav, gielav ja sebrudakiellemav. Ietjas dåjman de galggá institusjåvnnå arvusmahttet ja åvddånahttet mielludahtte birrusav bájkálasj sáme árvoj ja dábij baktu, ja risstalasj kulturárbev vieledit.

§ 2 Vuodoruhtadibme

Vuododusá vuodoruhtadibme le kr. 210.000,- máksemijn kr. 70.000,- iesj genga æjgádijs. Vuodoruhtadibme ij galga duohtaduvvat. Vuododusá dåjmadimkåntåvrrå le ietjas æjgon gnr./bnr. 60/367 Ájluovtan Divtasvuona, ja adræssa le 8270 Ájluokta.

§ 3 Stivrra

Vuododus jådeduvvá stivras gånnå li 5 ájrrasa. Dá válljiji stivrraájrrasijt ja sijá sadjásattjajt:  

- Sámedigge

- Sadjásasj suohkan

- Nordlánda fylkasuohkan

- Bájkálasj sáme organisásjåvnå

- Árrana bargge.

Stivra mierredimfábmo ja åvdåsvásstádus boahtá åvddån vuododuslágas ja galggá dåjmaduvvat buorre stivrrim ja jådedim prinsihpajs.

Stivrra ietjas vuodot ja vállji jådediddjev ja nubbejådediddjev. Stivraájrrasij ja sijá sadjásattjaj doajmmaájgge le 4 jage.

Stivran le mierredimfábmogisvuohta gå binnemusát 3 ájrrasa jali sijá sadjásattja li tjåhkanam. Jus jienaj låhko le avtabuohta de li tjåhkanimjådediddjen guokta jiena.

§ 4 Bæjválasj jådediddje

Vuododusá direktørra le bæjválasj jådediddje. Virgge le gávddavirgge gudá jahkáj. Virgge almoduvvá virggegávda låhpan. Virgge máhttá joarkeduvvat muhtem ájgev åhtsåma milta.

Ietjá virge virggáj biejaduvvi direktøras vuododusá barggijpolitihka milta, ma stivras mierreduvvi.  

§ 5 Vuobddem, vuorkkim ja hiejtedibme

Vuododusá ietjas tjoahkkáldahka kulturhiståvrålasj materiálas, duojes, dájdas, girjálasjvuodas ja dakkárijs ij dábálattjat galga vuobdeduvvat. Stivrra máhttá mierredit ájnegisgávnijt vuobddet maŋŋáj gå li tjielgadam Sámedikkijn mij guosská kulturhiståvrålasj materiálajda. Stivrra máhttá mierredit gávnijt vuorkudahkaj biedjat. Stivrra galggá mierredit fágalasj tjielggiduvvam njuolgadusájt hiejtedibmáj

§ 6 Njuolgadusáj ietjájduhttem ja rievdadibme

Njuolgadusáj ietjájduhttem ja rievddadibme dagáduvvá vuododuslága mærrádusáj milta. Ietjájduhttem ja rievddadimoajvvadusá giehtadaláduvvi stivras. Stivrra máhttá oajvvadit ietjájduhttemav ja rievddadimev gå 4 stuoves stivrraájrrasa oajvvadusáv jienastime baktu miededi.  Rievddadimoajvvadusá almoduvvi 6 vahko åvddåla låhpalasj mærrádusá.

Vuododusá ietjájduhttema ja iesjmiellusasj låhpadime bále galggi musea kulturhiståvrålasj materiála tjoahken aneduvvat ja Sámedikkijn galggá rádádallat gåktu dájt vijddábut háldadit.

§ 7 Ietjá vidjurij birra

Ietjá vidjurij birra ma e dájs njuolgadusájs mierreduvá, galggi vuododuslága ja dåjma ietjá lágaj ja njuolgadusáj milta mierreduvvat.