Bååstede – Ådå vuosádusrahpam Bådåddjo/Buvvda musean
Árran vuoset vuostasj vuosádusáv Bååstede-prosjevtan dávverijs ma li bidumsáme guovlos Vuonan. Vuosádusrahpam la gasskavahko biehtsemáno 19. biejve kl.17, Bådåddjo/Buvvda musean, Prinsensgt. 116, Bådådjon. Vuosádus la aktisasjbarggo gaskan Árran ja Nordlandsmuseet.
Gasskavahko biehtsemáno 19. Biejve, 2024 rahpus ådåstuhtedum musea Bådåddjon. Aktisattjat Árran julevsáme guovdátjijn rahpus Stádamusea Bådåddjon ådå hámijn Bådåddjo/Buvvda Musean.
Bådåddjo/Buvvda Musea 2024 le sierra musea mij la åvddånahtedum kultuvrraoajvvestádajage gånnå sáme kultuvrra ja dájdda la guovdátjin, ja majna Nordlandsmuseet aktisattjat la barggam Árran julevsáme guovdátjijn.
Dán aktijvuodan rahpap dav vuostasj vuosádusáv Bååstede-prosjevtan gånnå vuosedip dávverijt bidumsáme guovlov.
Bååstede-prosjækta la stuorra máhtsadimprosjækta gånnå sáme kultuvrraárbbe la máhtsaduvvam Norsk folkemuseum/Kulturhistorisk museajs sáme museajda.
Tjavtjan 2023 oattjoj Árran julevsáme guovdásj stuorra dávvertjoahkkev mij dålen lij tjoahkkidum julevsáme ja bidumsáme guovlos.
Dán vuosádusán vuosedip dávverijt bidumsáme guovlos. Da li sierralágásj dávvera majt dåssju gallegattja åvddål li vuojnnám.
Vuosádusrahpam la kl.17.00 musihkajn Mats Pavallis, Fuoskos ja das maŋŋel ságastallam bidumsáme identitiehta birra niellja buolvaj Sivertsen-fuolkes, Bájjdáris.
Sámedikkeráde Maja Kristina Jåma rahpá vuosádusáv.
Sæmmi biejve la duodjevuosádusrahpam vuosádusájn «Å gi den rette form». Dan vuosádussaj li aj duodjedávvera Árrana ietjas dávvertjoahkkes.
Dát vuosádus la sierralágasj vuosádus, gå åvddål ij la goassak vuoseduvvam nav edna duodje Bådåddjon.
Rahpambiejve uvsa rahpusi juo kl.15, mávsedahtek.
Kultuvrraoajvvestádajagev tjadá sjaddi vuoseduvvat moadda sáme kultuvrra ja dájddavuosádusá Bådåddjo/Buvvda musean.
Diehto vuosádusáj birra máhtá dánna låhkåt: Diehto vuosádusáj birra Bådåddjo/Buvvda Musean.
Dála l rahpambiejve prográmma: Prográmma biehtsemáno 19. biejve.
Vájmulattjat buorisboahtem vuosádusrahpamij!
