Ådå tjálos: Duobddága – sijda ja sámevuoda friddjasaje
Majt merkahi mijá duobddága midjij ja man láhkáj.
Dat la tjálos majt Árrana seniorrádevadde ja guoradalle Harrieth Aira la tjállám ja mij dálla l almoduvvam Sámi dieđalaš áigečállagin.
Tjálos la oasse dutkamprosjevtas «Sámij duobddákpraksisa, – ålggodåjma-ja dábe, bájkij namá, giella ja subttsasa» mij la vihpam 2019 rájes 2022 rádjáj.
Tjállagin Aira åvddånbuktá båhtusijt suv guoradallamis gånnå sån la ságájdahttám ulmutjijt åttjudittjat diedojt majt duobddága merkahi Divtasvuona julevsámijda ja man láhkáj.
Dán tjállusin la Aira guoradallam majt duobddága merkahi vuodna- ja merrasámijda gudi ælla ællosujton, valla gejda duobddága dåbdduji goappátjagá sijddan ja sámegiela friddjasadjen. Navti li sijá duobddága fáron bisodime julevsámij gielav ja identitiehtav rahtjalis ájgen gånnå sámij viessomvuohke juohkkat guovlos ájteduvvá.
Mijá mielas le dát tjálos viehka ájggeguovddelis tjálos gå sebrudagán la edna sáhka majt duobddága sámijda máhtti merkahit. Tjállusin tjalmostuvvá julevsámij gullumav luonnduj ja sijáv guoddalis luondo háldadiddjen.
Sámi dieđalaš áigečála la fáhkaguojmmeárvustaládum sámegielak diedalasj ájggetjála majt Sáme allaskåvllå ja UiT Norgga árktalaš universitehta Sámi dutkamiid guovddáš aktisattjat almodibá.
Tjállagav gávna dánna: Duobddága – sijda ja sámevuoda friddjasaje
Abstrakta
Gå merrasámij birra la sáhka, de álu la luondulasj usjudallat merrasámijn la sierralágásj tjanos merraj ja gájkkaj mij merrakultuvrraj gullu. Valla dán tjállusin mannap gáddáj, julevsámij duobddágijda Divtasvuonan. Mån lav guoradallam majt duobddága julevsámijda merkahi, ja lav tjadádam ságájdahttemijt nælljásijn gålmåt sajes Divtasvuonan sijáj dábij, práksisij ja dijdaj birra majt sij tjuovvu gå sij manni ietjasa duobddágijda.
Sidjij duobddága merkahi ednagav, vuoset muv dutkamus. Da li sijá giessesijda vuonaj sinna gånnå årru gidás tjaktjaj, ja da li sijá iemesijda. Da tjielggiji gåsi sij gulluji ájnegattjat ja juohkusattjat. Duodden li duobddága aj sámevuoda friddjasaje ja ájnnasa bisodahtátjit sámevuodav, julevsámegielav ja kultuvrav.
Dat tjálos la oasse Sámi dieđalaš áigečállaga 2022-nummaris.
Ienep tjállusa 2022-nummarin gávna dánna: Sámi dieđalaš áigečála
