ÁRRAN åhtså giellabarggijt. Stuoves virggáj.

Mij åhtsåp rádevaddev/ahkep rádevaddev mijá giellaguovdátjij, stuoves virggáj. Stuoves virgge mij máhttá jugeduvvat máhtudagáj milta. Mij åhtsåp aj ulmutjijt gudi máhtti barggat tijmmabálkkidime milta giellakurssadåjmaj.

Åhtsåmmierre le gålgåsdismáno 11. biejve 2021

Bargguj álggem le nav ruvva gå máhttelis.

29.09.202109:34 Ragnhild Lien Rahka


Árrana birra

Árran – julevsáme guovdásj ásaduváj jagen 1994 Ájluoktaj Hábmera suohkanin.

Árrana ulmmen le årrot nasjåvnålasj guovdásj mij nanni ja åvddånahttá sáme gielav, kultuvrav ja sebrudakiellemav julevsáme guovlon.  

Árran jådet museadåjmajt bidum- ja julevguovlojn, åhtsåmprojevtajt, kulturhuodnahav, giellaguovdátjav, almmudakdåjmajt j.n.á.. Vuododusán li 13 jahkevirge. Árran doajmmá sámegielak mánájårruhav sierra vuollásasjvidnudahkan.

Barggohuodnaha lájggiduvvi Sámediggáj, NRK Sábmáj, Hábmera suohkanij, Nuortta universitiehttaj, Statsped:aj.,Sáme låhkåmguovdátjij- Sáme allaskåvllåj, Hábmera æládussæbrráj. Oarjjelsáme máhttoguovdátjij j.n.á.

Ienep diedojt Árrana birra gávna dánna: www.arran.no

Giellaguovdásj

Árranin le åvdåsvásstádus doajmmat giellaguovdátjav julevsáme guovlon.  Sámedigge dåjmav ruhtat mij vásstet 1,5 jahkevirge. Vijddábut de la Árran guojmmevuohtasjiehtadus giellaåvddånime hárráj Nordlánda fylkasuohkanijn, ja prosjæktaaktisasjsjiehtadus Hábmera suohkanijn. Árranij ja ulmmen le åvddånahttet sámegielav intitusjåvnå oajvvegiellan.

Gå mijá bargge le hæjttám, sihtap duv sjaddat mijá ådå barggoguojmmen.  Árran jådeduvvá direktøras aktan jådedimjuohkusijn. Mij åhtsåp

Giellarádevaddev, stuoves virggáj 

Barggon li: 

  • Barggat giellaguovdátja dåjmajn.
  • Rádevadde/Ahkep radevadde.  Åvddånahttet ja doajmmat giellakursaj, Rádnastallam (giellasadje mánájda), ásaduvvamij, julevsáme girjálasjvuoda almodimij barggat j.n.a. 
  • Vásstedit dåjmajt ma gulluji åhtsåmijt tjállet, rappurtierit, jårggålimbargojt vásstedit j.n.á.

 

Barggodåjma sjaddi mierreduvvat dan ulmutja máhtudagáj milta guhti virggáj biejaduvvá. Gielladahkamusá máhtti ålggolis oasteduvvat.  

 Máhtudakgájbbádusá:

  • Buorre jus le alep åhpadus julvesámegielan, máhttet julevsámegiellaj tjállet ja sáhkadit. Barggo máhttá ráddjiduvvat máhtudagáj milta.
  • Åhtsåmusá prosjevtaj barggat, pedagogihkalasj åhtsåmusá li aj sávadahtte.

 

Persåvnålasj máhtukvuoda:

  • Persånålasj máhtuvuohta dættoduvvá.
  • Virgev tjuovvu duot dát barggo ma gájbbedi iesjrádálasjvuodav, valla aj ållo aktisasjbargov iehtjádij ja ållo mássjkedisvuodav.  

 

Árran fálla:

  • Gilbustalle bálkáv sjiehtadime milta.
  • Pensjåvnnå- ja juogosbuohttidusáv KLP:an
  • Sámegielak mánájårruhin sajev
  • Mássjkedis bárggoájgge.


Jus sidá lagáp diedojt virge birra, de válde aktijvuodav direktørajn Lars Magne Andreassen tlf. 75775105 jali 90775275

Åhtsamus aktan CV:ajn sáddiduvvá:

Árran – julevsáme guovdásj/lulesamisk senter, 8270 Ájluokta/Drag, jali dán mejla baktu: poassta@arran.no jali Lma@arran.no 

 

Fredrik Forsberg / Árran
, click to open in lightbox