Tiebmáiehket Árranin «Samer ved Storhavet» girje åvddånbuktemijn tjálles Johan Borgos

Buorisboahtem tiebmáiehkedij Árranin. Johan Borgos åvddånbuktá ietjas girjev, Samer ved storhavet
Ragátmáno 28. biejve kl. 19.00

Buorisboahtem tiebmáiehkedij Árranin. Johan Borgos åvddånbuktá ietjas girjev, Samer ved storhavet Ragátmáno 28. biejve kl. 19.00
13.09.202111:01 Anne Kalstad Mikkelsen

Johan Borgos la tjállám girjev duon dán vidjurij birra sáme histåvrås Dieldanuore (Tjeldsund) allebielen. Girjen gåvvit sån edna sámijt moattebelak kultuvrajn ma hiebadin bierggima milta, lehkusa várresáme, márkkosáme jali merrasáme. Siján lidjin juohkka lágásj æládusá degu ællobarggo, guollim, duodje, háksabiggim, bånndura ja smirjár, ja aj ållo oasástallam ietjasa dáttja ráddnáj.

Girjen la tiebmáoasse iellemvuoge ja kultuvrrahiståvrå birra, guovllooasse mij giehttu vargga tuvsán páraj birra gudi suollujn årrun jages 1600 gitta jahkáj 1820, ja fuolkkeoasse familljaregisstarijn sáme álmmugijn jages 1600 gitta jahkáj 1820. Guok maŋemus oasse gal sjattatji ávkálasj viehkkenævvon gájkajda gudi ietjasa sáme máttojt åhtsi dát ájges gå ælla nav moadda gáldo giedaj åvdån.

Historihkkár Johan Borgos la moadda bájke girjátjijt almodam ja vissjalit lågådallá Viestarále sáme kultuvra ja histåvrå birra. Åvddåla la tjállám girjátjav «De er her ennå» Viestarále merrasáme histåvrå birra.

Johan Ingvald Borgos la riegádam jagen 1939 Ikšnásjen (Øksnes). Sån la historihkkár, åhpadiddje ja åvdep bájkij girjátjij tjálle, tjoahkkáj la tjállám 14 girje suohkanij Ánddasuolu (Andøy), Suortá (Sortland) ja Ikšnášši (Øksnes) birra.

Mij Árran ávvudallap iejvvitjit Johan Borgosav ja ienebut gullat suv girje birra. Åvddånbuktema maŋŋela bæssá ienebut Borgosijn ságastallat.

Buorisboahtem!

Gåvåv luojkkam: Johan Borgos
Familja Inga ja Svonni elujn, gåvvidum Suortán (Sortland) jagen 1890. Gåvvijiddje la biedjam lågenannælljásav familjajs boahttsuj gasskaj.
, click to open in lightbox