L
Ønsker du å motta nyhetsbrev fra Árran?

Registrer inn din epostadresse under. Du kan også kontakte oss pr epost: poassta@arran.no eller telefon +47 757 75 100

 

w

Tjoaggem- ja láttakprosjevta dutkamjuogos la æjvvalam

Tjoaggem – ja láttamprosjevta dutkamjuogos álgadij dán jagev aktisasj fágalasj æjvvalimijn Áltán.

20.01.202014:36 Harrieth Aira

Vuostasj æjvvalibme

De la vuostasj bále gå prosjevta dutke tjåhkanin maŋŋel gå prosjækta álgaduváj snjuktjamáno 2019. 

Prosjæktajuogos la gidán ja tjavtjan 2019 ságastam Skype (video) baktu duon-dán birra ma prosjæktaj gulluji, ja diededam nubbe nubbáj prosjevta åvddånimev Divtasvuonan, Porsáŋgon ja Unjárgan. 

Juo lij de muddo æjvvalit nubbe nuppijn plánitjit boahtte bargojt, ja ságastallat fágalasj gatjálvisáj birra.   

Ålggobarggo mij tjadáduváj giesen ja tjavtjan 2019 vuosedi duov-dáv ma miellodahtti. Dát guosská goappátjagá árbbedábálasj máhtudagájt vuodna- ja merrasáme guovlojn ma gulluji merragáddáj luohkkoguovllon ja ma gulluji mæhttsáj ja várráj luohkkoguovllon. 

Sámij dádjadus ietjasa duobddágijda vuohttu nannusit tjadnum adnemij, dábijda ja subttsasijda gånnå sámegiella, sáme nammadusá ja tjielggidusá, ja bájkenamá li ájnas gáldo bisodittjat sáme árbbedábálasj máhtudagájt, máhtudagá ma li åmastuvvam buolvas buolvvaj, ulmutjis ulmutjij dájn guovlojn. 

Mij gudi dájna prosjevtajn barggap ávvudallap dájt diedojt guoradallat vijddábut.

Mij galggá vil dáhpáduvvát?

Boahtte prosjæktatjåhkanibme sjaddá Porsáŋgon. Biejvve ij la ájn mierreduvvam. 

Giesen 2020 plániduvvi duodde ålggodåjma gånnå l ulmme oassálasstet ålggon diedediddjij siegen juogu merragátten jali miehtsen ja váren. 

Prosjevta gasskaseminárra plániduvvá liehket Divtasvuonan tjavtja bielen 2020. 

Gasskaseminárraj aj bivddiduvvi dutke luohkkojuohkusin Sáme allaskåvlås, Råmså universitehtas ja Saskatchewan universitehtas.

Dan aktijvuodan plániduvvá rabás tiebmáiehket/jali åniseminárasj gånnå prosjevta barggo åvddånbuvteduvvá dan mudduj, ja aj gånnå l ulmme ságastallamav åttjudit dán tiemá birra. Ienep diedo båditji goassa dat dáhpáduvvá. 

Prosjæktajuogos la aj guoradallagoahtám almodibmáj.

Båhtusa diededuvvi tjállusij goappátjagá nuorttasábmáj ja julevsábmáj, dárruj ja ieŋŋilsgiellaj.

Ienep gaskostime aj plániduvvi ma dálla liesski li plánima vuolen, ja ma båditji jage 2021 nalon. 

Prosjækta vihpá ájn dán jage ja boahtte jage (2021).

Dánna máhtá låhkåt ienep diedojt prosjevta birra.

Dánna máhtá låhkåt láddimprosjevta åvddånibme Divtasvuonan.

Prosjæktaguojmij næhttabiele:

Mearrasiida

Sámi allaskuvla

Norsk institutt for naturforskning

Ienep diedojt vaddá Harrieth Aira, Árran Julevsáme guovdásj,

tlf. 99 04 73 56, e-poasta: harrieth.aira@arran.no.

 

John Law
Gårob. Harrieth Aira, Árran, Steinar Nilsen, Mearrasiida, Solveig Joks, Sámi allaskuvla, Stine Rybråten, NINA, Svanhild Andersen, Mearrasiida