Julevsáme giellakonferánssaj ragátmáno 15.–16. biejve 2026
Sáme Giellagálldo ja Árran julevsáme guovdásj bivddi julevsáme giellakonferánssaj ragátmáno 15.-16.biejve Árranin Ájluovtan, Hábmera suohkanin.
Konferánssa tjoahkki giellaaddnijt, fáhkabirrasijt, institusjåvnåjt ja mierredimfámojt Vuona - ja Svieriga bieles Sámeednamin. Oajvvetiebmá l julevsámegiela terminologijjaåvddånahttem åhpadusán, gånnå dahkojiermme (DJ) l aj tiebmán.
Lågådallamij ja aktisasj ságastallamij baktu tjalmostahttep gåktu ådå terma ja bágo hæhttuji giela ietjas struktuvrav ja sissŋálasj ájádallamvuogev tjuovvot, ja dættot sæmmi bále dárbov sieradit giellasuorge ja normeridum tjállemgiela gaskan. DJ vaddá máhttelisvuodav tjoahkkit ja analyserit gielladáhtáv, ja máhttá årrot viehkken terminologijja ja giellaåhpadusá åvddånahttemijn.
Konferánssa tjadáduvvá ájgen gånnå Duohtavuoda- ja såbadimkommisjåvnå rappårttå l vilá ájggeguovddelis. Stuorradikke rappårttågiehtadallam dættot dárbov nanostuhttet sámegielajt ja sihkarasstet buorre dilijt giellaåvddånime hárráj. Doajvvop konferánssa máhttá viehkedit tjalmostit giela sajev boahtteájge teknologidjan ja máhttosebrudagán.
