Goabddá-prosjevta álgadibme
Dán vahko le Árran Englándan.
Mij guossidip guokta musea, nubbe Cambridge:in ja nubbe vas London:in gå dáj guokta museajn li julevsáme ja bidumsáme goabddá sijá dávvertjoakkáldagájn.
Prosjækta «Tjiehkusis vuojnnusij - Goabddá - de samiske trommene» le stuorra duodastim -ja guoradallamprosjækta Árranin, mij galggá ådå diedojt julevsáme ja bidumsáme goabddáj birra buktet ja goabddáj kultuvralasj ja histåvrålasj dádjadusáv.
Nordlánda fylkasuohkan ja Sámedigge li prosjevtav ruhtadam mij dahkam la máhttelisvuodav Árranij dáv manov tjadádit Cambridge universitiehttaj ja British museaj álgadittjat vuostasj guoradallamijt.
Gåvån vuojnnep Rachel Hand ja Jan-Henrik Hartung gudi barggaba Museum of Archaeology and Anthropology Cambridge:an, aktan Árrana dutkamjådediddje Oddmund Andersen ja dávvertjoahkke fáhkajådediddje Harrieth Aira, ja da guokta goabddá majt mij lip gehtjadam ja gåvvidam.
Sæmmilágásj guoradallama aj dagáduvvi maŋŋel dán váhko British musea:n.
Lågå aj: Árran mottar støtte til nytt forsknings- og dokumentasjonsprosjekt om samiske trommer
