Mujttobágo Inga Karlsen
Surgujn oattjojma buodáv at Iŋŋgá dáv iellemav guodij basádismáno 29. biejve 2025. Ájnas ja dárbulasj jiedna julevsáme sebrudagán sjávvunij.
Iŋŋgá l guhkes ájgev åvddågietjen åvdedam julevsáme gielav, kultuvrraárbev ja bájkálasj sebrudagáv. Måttijt jagijt politihkkárin Divtasvuonan suohkanin gånnå sån aj sebraj pládnajuohkusij mij vuododij Árranav. Ja gå galgajma åttjudit nasjåvnålasj ruhtadimev Árranij de lij sån ájnas ietjas berustime baktu Guovdásjbelludagán ja Guovdásjnissunij gaskan. Árran la akta dajs tjielggasamos merkajs suv bargos politihkan, ja gåktu Iŋŋgá nannusit vuojnij dárbov julevsáme sebrudagáv nannit Vuona bielen.
Iŋŋgá lij åvddågietjen mij gulluj julevsáme giellaj. Sån tjálij mánájgirjijt ja sálmajt ma lidjin ájnnasa mánájda, familjajda ja tjoaggulvisájda dájn birrusijn. Iŋŋgá låggŋij gielav moatten aktijvuodan; politihkan, kultuvra- ja sebrudakbargojn ja ietjas berustime baktu mij gulluj vuorasulmutjijda, sierraláhkáj vuoras sámij gaskan. Dat bargos mij gulluj vuoras ulmutjijda ja ulmutjijda demensajn oattjoj sån gånågisá ánssidusmedáljav jagen 2015, guddne mij gåvvi gåbddudagáv ålles suv bargos sebrudagán.
Iŋŋgá lij aj jáhko ja tradisjåvnåj guodde. Suv nanos ja persåvnålasj jáhkko jubmelij bájnij Ingav ja aj suv birrasav, dássta báhtsi aj luotta moatten aktijvuodan.
Suv barggo mij gullu giellaj, ietjas álmmugij, nissunijda ja vuoras ulmutjijda vuojnnu ájn uddni. Mij sjaddap mujttet suv tjiehpes, tjielgga ja liegga jienav mij ittjij goassak hæjttám rahtjat julevsáme aktisasjvuoda åvdås.
Sávadip ráfev Inga mujttoj, oasálasttep Iŋgá familja siegen surggon, ja aj suv berrahij, venagij ja divnaj siegen gudi li ávov dåbddåm gå li Iŋgá siegen bessam barggat.
Maŋemus várrudahka gijttevasjvuodan ja vuollegisvuodan
Árran julevsáme guovdátjis
Filip Mikkelsen
Direkterra/direktør
