Sáme dájddár Keviselie/Elle-Hánsa/Hans Ragnar Mathisen (r. 01.07.1945) Sálašvákkes la mierredam ietjas dájddagav Árranij vaddet. Árranin lip viehka gijttevattja ja ávon vattáldagá åvdås ja lip mierredam dav ávvudahttet navti váj åvddånbuktep Keviselie/Elle-Hánsa/Hans Ragnar Mathisena vuosádusáv «Dáiddaeallin / Et liv av kunst».
«Dáiddaeallin / Et liv av kunst» la litografija, muorradieddema ja giehtatjuorgadum kárttaoriginála ja vuoset dájddára bargov måttijt lågij jagij tjadá. Vuosádusán li aj dájddaga ma dájddára udnásj dåjmav gåvvidi degu mállaga duobddágijs ja ulmutjijs.
Vuosádusán la unna oasásj Mathisena dåjmas gåvvådájddárin. Suv hásstaliddje iellem, vájmulasj berustibme sáme sebrudagáj vuoksjuj ja luondos ja birrasis båhti åvddån suv dájdan. Sån la dåbdos ietjas bargos sáme bájkkenamáj ja sáme kartografiajn.
Mathisenin li læhkám vuosádusá 1970 rájes Sámen, Skandinavian ja ålggorijkan ja la moadda almulasj ásadusájt hiervvim.
Sån la låhkåm Stáhta Giehtabarggo- ja Dájddaindustriskåvlå mállimlinjav ja Stáhta dájddaakademijav, mállim ja grafihkka bagádallij degu Ludvik Eikaas.
Buorisboahtem!
