Dán jagásj javllavattáldahka
Iektu diehttuj jut dán jage vaddá Arkijvvadåjmadahka ja Sáme arkijvva javllavattáldagáv sáme museajda ja kulturásadusájda: Nåvgå digitaliserit ietjasa arkijvajt.
Dát la vattáldahka sáme álmmugij Sáme arkijva 25-jageávvudibmen.
– Dát la sáme kulturárbe hárráj histåvrålasj låpptim, javllá rijkaarkivvárra Inga Bolstad, ja dasi mij ållásit guorrasip.
Dát la riek buorre vattáldahka bisodittjat ja sadjihin biedjat sáme kulturárbev. Ja vijmak máhtti Árrana arkijva digitaliseriduvvat vaj sadjihin sjaddi álmmugij.
Árran la vuosstájválldám moadda arkijvajt ájnegis ulmutjijs majt hálijdip digitaliserit, dagu dåbdos Mikal Urheim-rávkke arkijvav, åvdep sámedikkepresidenta Sven-Roald Nystø arkijvav, tjálle ja historihkkár Torbjørn Storjord-rávkke bájkkenammaarkijvav ja duodjeorganisasjåvnå Julevsáme duodje arkijvav, ja duodden ietjá arkijva.
Árran vuosstájválldá vil ienep arkijvajt, sierraláhkáj nissunijs, ja åvdep ja udnásj duodjárij arkijvajt. Válde aktijvuodav jus hálijda árkijva galggi vuorkán boahtte ájggáj.
Árrana gåvvåtjoahkke galggá digitaliseriduvvat
Arkijvadåjmadahka la aj rudájt juollodam Árrana gåvvåtjoahkkev digitaliseritjit ma uddni li dåssju páhpergåvå ja slidesa. Dat barggo dagáduvvá aktisattjat Arkiv i Nordland-dåjmadagájn, ja álgaduvvá boahtte jage.
Mij ávvudallap gå sáme kulturárbbe galggá digitaliseriduvvat, ja ávvudallap buorre aktisasjbargov Sáme aktijvajn ja Arkiv i Nordlandajn.
Lågå præssadiedádusáv Arkijvvadåjmadagás:
Arkivverket innfører gratis digitalisering av samisk kulturarv
Ienep diedo: Museajådediddje Harrieth Aira, tlf. 99 04 73 56, e-post: harrieth.aira@arran.no.
