Kulturmujttobiejve 2023 – Árran almot DigitálaMusean

Diedá gus mij sválltjá la ja gåktu dat vuojnnu, jali masi giessamav adnet? Li gus ave sæmmilágátja bájnoj ja minsstarij hárráj? Gåktu vuojnnu gierkam ja mij la dat dárruj? Árrana dávvertjoahkken máhtá oahpástuvvat julevsáme duodjáj.  

Ragátmáno juohkka jage ásaduvvi Kulturmujttobiejve. Dat la Vuona stuorámus histåvrrå- ja kulturárbbefestiválla.

Viesso kulturárbbe

Dán jagásj tiebmá la «Viesso kulturárbbe». «Viesso kulturárbbe» sievet práksisijda, máhtudagájda ja tjehpudagájda ma li tjuovvum buolvas buolvvaj, ja ma vilák uddni aneduvvi, gåktu ævtásj kulturárbbe la udnásj kulturárbben sjaddam, ja gåktu dát árbbe, ulmutjij baktu gudi diedojt ja máhtudagájt nuppes nubbáj vaddi, bisoduvvá boahtte buolvajda.  

Dán jage Árran oassálasstá Kulturmujttobiejvijda vuosedime Árrana dávvertjoahkkev DigitálaMusean.

Dálátjij li dåssju dávvera Bååstede-prosjevtan vuojnnum DigitálaMusean. Valla dán jage ávos máhttep vuosedit ienep dávverijt, aj Árrana ietjas dávvertjoahkkes, sierraláhkáj tjadnum viesso kulturárbbáj dagu duodje ja sámegiella.  

Dánna máhtá duola dagu gæhttjat dávverijt nuppát væráltdoaros dagu guottádahka ja «forpleiningssett». «Suokavuom-Anna», Anna Pedersdatter Suoksavuomes Hábmerin lij akta sáme oahpestiddjijs guhti lej fáron oahpestiddjeværmádagán Hábmerin ja Divtasvuonan nuppát væráltdoaro, viehkedittjat ulmutjijt friddjavuohtaj Svierigin. Diehti gus dån jut soames  dávvera suv sijdas Suoksavuomes vilák li ájmon? Dajt máhtá gæhttjat DigitálaMusean.  

Mij årrop merrasáme guovlon gånnå guollim ja guolástus le årrum, ja vilák le, ájnas midjij. Majna dal ájn åvddåla guollijin? Sláhpá la akta guollimvædtsak, valla mij la sláhpá? Aneduvvá gus sláhpá vilák uddni guolástusán? 

DigitálaMusea baktu máhtá oahpástuvvat muhtem dávverijda majt mijá musea la várajválldám, ávvon ja ávkken udnásj ja boahtte buolvajda 

Mij la DigitálaMusea?

Dábálattjat museaj dávvertjoahkke vuojnnuji vuosádusájn ja girjijn, ja stuorra oase tjoahkkes vuorjját ja ihkap ij goassak vuoseduvá álmmugij.  

Valla DigitálaMusea baktu li dávvertjoahkke ienebuv sadjihin gájkajda, berustahtek ájgge ja sadje, ja tjoahkke máhttá aneduvvat gåvvååhtsåmusájda, tjiegŋodibmáj, låhkåmidja, åhpadibmáj ja aktisasj máhtudaklåpptimijda. Navti máhttá kulturárbbe máhtudagáj låpptit, ájádallamijt båktet ja ságastallamijt jåhtuj oadtjot gåktu lij åvddål, buohtastahtedum udnásj dilláj.  

Jur dalla máhtá oahpástuvvat dajda dávverijda ma uddni li almoduvvam ja duodden Bååstede-prosjevta dávverijda ma juo li almoduvvam danna. Valla Árran sjaddá dás-duohku maŋenagi almodit ienep dávverijt Árrana dávvertjoahkkes. 

Jus dujna li gatjálvisá jali duoddima de la máhttelis kommentierit DigitálaMusean juohkka dávvera vuolen.  

Dån gávna Árran julevsáme guovdátjav DigitálaMusean gå dáv sválldasav tjuovo: https://digitaltmuseum.no/owners/ARR

Dån máhtá aj mannat https://digitaltmuseum.no/, ja åhtsåt danna Árranav, åhtsåmbágujn Árran.