Ruhtadoarjja Viesso duobddága prosjevtajda

Árran julevsáme guovdásj le oadtjum prosjæktarudájt Regionalt forskningsfond Nord-Norge's. 250.000 kr kvalifiserimprosæktaj Viesso duobddága 2017 tjavtja. Ulmmen le oajvveprosjevtav åvddånahttet oattjotjit ådå diedojt julevsáme guovlo duobddágij ávkástallamis ja dádjadimes. Árran ájggu prosjevtav tjadádit ietjas háldon, valla aktisasj oassevállde li UiT Vuona arktalasj universitiehtta ja Sámi allaskåvllå

15.02.201708:51 Martin Rimpi

«Midja lip nav ávon gå Åtsådimfåndas oattjojma ruhtadimev», javllá Árran-direktørra Lars Magne Andreassen. «Mij doajvvop prosjækta buktá ådå diedojt åvddånahtátjit mijá musea vuosádusájt. Dát de sjaddá oassen mijá ájggomusájda låpptitjit Árranav oalle buorre sadjen muossádimijda ja diedojda", joarkká sån.

Prosjækta Viesso duobddága galggá buktet åvddån ådå diedojt sámij duobddágij ávkástallamis ja dádjadusás diehtaga duogátjis. Dá diedo sjaddi de vuodon Árrana musea saddjisasj ja digitálalasj gaskostimes, ja muossádimbuvtagijda ma li åvddånahteduvvam almulasj ja priváhta mannulakvidnoaktørajs. Dá diedo sjaddi aneduvvat oassen åvddånahtátjit bájkálasj ja guovlolasj mannulagáj muossádimijt. Dá diedo máhtti aj buktet mannulagájda åvddånimev mij jåkså nasjonalalasj dásev oassen «Nuorttavuona mærkkagálvon"("Den nordnorske merkevaren»), masi le Nordlánda fylkasuohkan sáme kultuvrav oassen nielje dåjmajs. Duodden de prosjækta sjaddá Árrana åtsådime åtsådallamijt nannit ja værmádagáv tsieggit åtsådimintsitusjåvnåj majn li máhtudagá sáme duobddákdádjadusájs. 

Árran le bálkkim histåvrråtjállev dr. art. Oddvar Svendsen'av prosjæktajådediddjen. Suv fáhkaduogásj le måttijs åtsådimijs guovllo- ja bájkálasj prosjevtajs Nuortta-Vuonan ja duodden sierrarádevadden kultursuodjalimsuorgen. Prosjæktajuohkusin li gudás Arrana ietjas barggijs – Oddmund Andersen (arkeologa), Harrieth Aira (sebrudakdiehtte ja museajådediddje), Svenn-Egil Knutsen Duolljá (giellaguovdátja jådediddje), Martin Rimpi (åvddånahttem- ja prosjæktavásstediddje ja Lars Magne Andreassen (sebrudakdiehtte ja direktørra), ja duodden le professor Jens Ivar Nergaard UiT'as ja vuostasjamanuensis Kaisa Rautio Helander Sámi allaskåvlås. Kvalifiserimprosjækta sjaddá álgget bårggemánon 2017 ja vihpá gitta ådåjakmánnuj jagen 2018.

«Mijá ulmmen le oajvveprosjevtav jåhtuj oadtjot. Dát sjaddá stuorra vuojtton Árranij musean ja mannulakæládusá åvddånahttemij julevsáme guovlon», javllá direktørra Lars Magne Andreassen.