Rádnastallam tjaktja 2022
Joarkkep Rádnastallamijn majna lip árabu vuorbástuvvam!
Árran joarkká prosjevtajn Rádnastallam, ja aj dán jage fáladuvvá sierra giellaariená oahppijda 1. dáses 7. dássáj gejn la sámegiella vuostasjgiellan ja 5. dáses 7. dássáj gejn la sámegiella nubbengiellan. Oahppe tjuovvu ietjasa klássajt.
Giellaariená ulmme la mánájt sámástittjat oadtjot, gånnå mánná iesj aktijvalattjat vállji sámegielav guládallamgiellan. Galggap suohtas dåjmajt aktan tjadádit. Dajnas de ij la Rádnastallam degu dábálasj skåvllåinstitusjåvnnå. Máná juo muhtem mærráj sámegielav máhtti, ja Rádnastallam sjaddá ariená gånnå sámegielav bessi adnet. Dát la ariená gånnå sámegielas le dárbbo, ja gånnå sámegiella la kul. Dát la ållu ietjá gå arienáv majt máná juo skåvlås dåbddi.
Rádnastallamin galggap suohtas dåjmajt aktan dahkat sámegielajn guládallamgiellan, dajnas li diedon dåjma guovdátjin. Galggap tjadádit dåjmajt ma mánáj mielas li suohttasa. Aktan mánáj gárvedip dåjmajt ja ståhkusijt báles bálláj. Juohkka vahko álgon sáddip sms æjgádijda diedoj dåjmaj birra.
Jus máná galggi sæbrrat rádnastallamij de vierttiji sámegielav ságastit, ælla dåssju nuora gudi galggi sámástit, máná vierttiji aj gaskanisá ja nuorajda sámástit. Jus máná mielas le vehik unugis sámástit de oadtju mánná huoman sæbrrat. Jus náginin la dárbbo dárustit de lip mierredam sierra bájkev gånnå la loahpe dárustit, dat gut sihtá dárustit oadtju de mannat dasi. Ietján galggá gájkka guládallam sámegiellaj doajmmat.
Mánnodagá: 1s (1.-4.kl)
Gasskavahkko: 2s (5-7.kl)
Duorastahka: 5.-7.kl
Kjerstin, Christel, Kim, Gabriel, Sofie ja Mikaela le dán tjavtja bagádalli.
Mánnodagá 17.10, gasskavahkko 19.10 ja duorastahka 20.10 æjvvalip vuostasj bále dá tjavtja Árranin (oabme mánájgárden) kl.18.00.
Diededibme: Jus duv/dunnu mánná ájggu oassálasstet, sáddijihtte sms æjgádij tlf.nummarij Jørn-Robert Knutsen (90763596), nav de vahkkusattjat guládallap dåjmaj birra.
Varrudagáj
Jørn-Robert Knutsen
