Gieres Elle-Hánssa/Keviselie/Hans Ragnar Mathisen!
Sávadip vuorbev dunji UiT- Vuona arktalasj univeresitiehta guddnedåktåra nammadimijn. Vuorbbesádadusá aj Gånågislasj St. Olav Guddnebálkkájn. Dáha li ánssiduvvam gudnnebálkká nammadime masi mij ålleslattjat sæbrrap. Gijttep aj UiT- Vuona arktalasj univeresitiehtav mij guddnedåktåra nammadime baktu Elle-Hánsa dájddadagojt ja iellembåhtusijt låppti.
Li árvulasj dájddadago ja mihtos iellembargo majt midjij siebrudahkan la vaddám. Jage 2021 tjavtja ávvudalájma duv siegen aktan Råmså Dájddasijdajn gå dájddavuosádusát Råmsån rabájma. Lijma aj akta dajs gudi oajvvadin jage 2021 John Savio guddnebálkáv dunji, mij rahpambåttån aj gálggiduváj dunji. Árvustallama vuodustibmen vuosedijma duv vijdes ja árvulasj dájddabargojda ja åvddånbuktemvuogijda, duv sáme- ja álggoálmmukpolitihkalasj siebrudakberustimijda, sáme dájddajuohusa vuododibmáj, sáme kulturmujttobargguj, juornálistihkkaj, álggoálmmukfestivála dålajda ja nåv edna vil duodden. Dådnå åvdedi midjij vuojnojt ja ådå perspektijvajt ájgegávddanimmáj ja væráldij, ja tjalmostahtti ja duodasti mijájt sámijt kártaj baktu ådå vuogij milta.
Jagen 2017 vaddi stuorra oasev ietjat dájdas, girjijs ja árkijvas Árran Julevsáme guovdátjij. Javlli dalloj sidodat le juhte dájddatjoahkkáldahkat luluj avta sáme ásadusán tjoahken bisoduvvat. Sjiehtadus gaskanimme vælggodahttá Árranav háldadittjat ja vuorkudittjat dájddagav bælostahtte dájddafágalasj vuogij milta. Árran galggá tjáledit divna dájddadagojt ja gaskostit dájddagav stuoves ja gasskabåddåsasj vuosádusáj baktu, ja vájkkudit vaj dájddat ietjá vuosádusájn ja museajn vuoseduvvá. Mij lip dán jage (2022) dájddamagásijna tsieggimav ållidam.
Dájddavattáldaga sisadno la birrasij 10 000 - 15 000 dájddadago tjoahkkáj, aktan duhádij hámij ja girjjusa gáradum girjjen. Dáhta hásstal mijáv. Gæhttjalip gávnnat buorre tjåvddusijt dajda, valla ásadussan dárbahip viehkev bargguj. Vájku lip ietjama fámojt bargguj biedjam, ij la Árranin stuoves ruhtadibme dájddavattáldagá fágalasj háldadibmáj åvddålig guovlluj. Dási aj gullu vuosádallambájkke dájddagij. Gatjálvissan tjuovvu de gåktus sáme- ja Nuortta-Vuona dájddatjerda lulu organisieriduvvat ja vuojnnut bahtte ájgen, vuohke masi duv dájddatjoahkkáj aj la sadje. Låhpalattjat sjaddá gatjálvissan gåktu lulup duv dájddadagojt ja iellembåhtusijt árvvusattjat máhttet værddogisvuodajn giehtadallat.
Mihtos láhkáj, ávujn ja gijttulasjvuodajn sæbrrap mij dajda gudi uddni li vuorbev dunji sávadam guddnedåktåra nammadimijn.
Lars Magne Andreassen
Direktørra
Ragátmáno 1.b. 2022
