– Duohtavuoda- ja såbådimkommisjåvnnå vuojnná sierra dárbov åttjudit julevsáme giellamáhtudagáv mij gullu subtsastjoaggemij dárojduhttempolitihka ja vierredagoj birra. Kommisjåvnnå dåhkkit Árrana giella- ja kultuvrramáhtudagáv ja dættot dav buorre bargov majt institusjåvnnå le dahkam sebrudakåvddånahttemijn sáme guovlojn, javllá tjállemdåjma jådediddje Liss-Ellen Ramstad.
Árran le nasjonálalasj sáme institusjåvnnå mij galggá tjårggit, åvddånahttet ja joarkket julevsáme kultuvrav, gielav ja sebrudakiellemav. Árran dåjmat museav, giellaguovdátjav ja kultuvrraguovdátjav.
-Árrana museadåjman le læhkám guovdátjin bajedit gássjelis ja tabu-ássjetjuolmajt. Moattes li vájkkuduvvam dárojduhttempolitihkas ja li vierredagojt åtsådallam. Ájnas le kommisjåvnnåj divna galggi oadtjot máhttelisvuodav juohket ietjasa subttsasijt dan giellaj masi sihti, adjáj julevsábmáj. Árran galggá kommisjåvnåv viehkedit dájna guoradallamij, javllá Ramstad.
Dát sihtá javllat Árrana bargge máhtti tjoagget ulmutjij subttsasijt, ja máhtti ulmutjijt ságájdahttet kommisjåvnå åvdås. Dát dáhpáduvvá kommisjåvnå vuoge ja ságájdahttembagádusá milta. Árrana bargge hæhttuji tjuovvot sæmmi láhkamierreduvvam sjávodisvuodavælgov dagu kommisjåvnnå.
Lågå ienebuv dán sierralága birra dánna: https://uit.no/kommisjonen/presse/artikkel?p_document_id=672120
Javlaj åvddåla le Duohtavuoda- ja såbådimkommisjåvnå guoradalle Anna-Kaisa Räisänen, åhpadam Árrana barggijt kommisjåvnå barggovuogijda. Dát merkaj Árran máhttá ruvva álgget ulmutjij subttsasijt tjoahkkit. Ulmutja máhtti buktet subttsasijt tjálalattjat, jiena-/gåvvåbáddima baktu, jali máhtti ságájdahteduvvat.
– Mij lip ávon gå oadtjop kommisjåvnåv viehkedit dájna ájnas bargojn, ja sávvap moattes guládalli mijájn ietjas subttsasav juogátjit. Ij le dát dåssju julevsámegielagijda, valla aj dárogielagijda. Jus galggap nahkat avtaárvvusasj ja buorre sebrudagáv oadtjot, de lip duohtavuohtaj tjanádum, dán vuolen aj vierredagojt ma li dáhpáduvvam åvddån båhti. Ja vaj mij máhttep såbadit ja åvddålijguovlluj gæhttjat dajna álgujn, javllá Árrana direktørra.
Kommisjåvnnå boahtá julevsáme guovlov guossidittjat jagen 2021 ja sihtá dan aktijvuodan gåhttjot bájkálasj viesádijt kommisjåvnåjn æjvvalit. Máhttelis le ájn ulmutjijda, institusjåvnåjda, ja orgánajda julevsáme guovlos guládallat njuolgga kommisjåvnåjn. Lågå ienebuv guoradallama birra dánna. https://uit.no/kommisjonen/presse/artikkel?p_document_id=672120
Tjállijdåjma jådediddje Liss-Ellen Ramstad javllá Duohtavuoda- ja såbådimkommisjåvnnå máhttá aj aktisattjat barggat ietjá aktisasjbarggoguojmij guoradallamin.
– Árranav bargadit kommisjåvnå åvdås, le ållu tjielgga Stuoradikke mandáhta milta mij javllá subttsasij tjoaggem lahkabirrasis ja ietjá bájkijs máhttá dagáduvvat dåhkkiduvvam aktisasjbarggoguojme guoradallamininstitusjåvnån.
Dáj vuogij milta, de máhttá kommisjåvnnå nannusappot álggodádjadusáv oadtjot juohkusij ietjasa histåvrå dádjadusás, javllá Liss-Ellen Ramstad.
Gåvvå: Árran.
