Váregålle - Ådåsa láttakprosjevtas

Juo l vas láttakájgge, ja muddo l buktet oanegis diedojt láttak-dutkamprosjevta birra.

6. Aug 2020
05.08.202000:00 Harrieth Aira

Jáhke álgij ållo plánaj, valla covid-19 diehti mij ilmaj snjuktjamáno hæhttujin plána maŋeduvvat.

Ålggobarggo mij galgaj tjadáduvvat giesen 2020 le maŋeduvvam. Dav sæmmi l prosjektjuohkusa tjåhkanibme Porsáŋgon, ja prosjevta gasskaseminárra mij plánaj milta luluj Divtasvuonan liehket tjavtja bielen Dutkambiejvijda 2020 oassen.   

Valla jus ga corona-dávdda le prosjæktabargguj buktám maŋŋunimev de li huoman muhtem ietjá oase tjadáduvvam nav gåk galgaj.

Muhtem ságájdahttema li tjáleduvvam jiednabáttes tækstan, tjálalasj gáldo li guoradaláduvvam ja artihkaltjállembarggo la álgaduvvam. Dát barggo joarkká tjavtjan.

Ja de doajvvop dán jagásj plána máhtti farra jåhtuj boahtet boahtte jage, jus prosjækta bæssá vijdeduvvat jagijn.

 

Tjáhppis tjalme

Gasskavahko lij NRK Sámen artihkal mijá dutkamprosjevta birra.

Gatjálvis lej ma littji da tjáhppis tjalme/tjuokka ma muhtem láttagijn vuojnnuji, jus la várálasj bårråt dakkir láttagijt ja manen ihti dakkir tjáhppis tjalme/tjuokka muhtem láttagijn.

Dáv artihkkalav máhtá dánná låhkåt: Derfor er det svarte prikker på multebær

 

Le gus buorre láttakjahke?

Mediá la aj diededam riek buorre láttakjagev dán jage, ja ållusa juohki láttakgåvåjt sosiála mediájn dagu Instagramman ja Facebookan.

Jus ga gålggedávdda ij luojte mijájt gålgåtjit manojda væráldav miehtáj, de le máhttelis mannat jæggáj tjoahkkátjit varás láttagijt.

Så sidá gus juohket ij dåssju láttakgåvåjt, valla aj ietjat láttakhiståvråjt, láttaksubttsasijt ja láttakådåsijt? 

  • Le gus dån jiekken læhkám láddimin?
  • Gåktu l dán jagásj láttakjahke dunji årrum?
  • Le gus láddim?
  • Le gus buorre láttakjahke nav gåktu mediá diedet, vaj li gus bájkálasj sieradusá?
  • Le gus vuobddám láttagijt, ja mij la láttakhadde dán jage?
  • Gåktu dån riejddi láttagijt? Le gus dujna nágin láttakbiebbmobagádusá masi lijkku?

Jus dujna l miella juohket ietjat láttaksubttsasijt ja ådåsijt mijáj dutkamprosjevtan – tjálesta jali rája mailav Árrana prosjæktaguoradalláj: harrieth.aira@arran.no, jali rinngusta tlf. 99 04 73 56.

Le gus dujna gåvå majt sidá mijáj juohket de válldep vuosstuj, dajna ævtojn dån dåhkkida mij máhttep gåvåv/gåvåjt adnet nåvgå, diehttelis gåvvididdje namma sjaddá diededuvvat. Gåvå maŋŋáj vuorkkiduvvi Árran-musea gåvvåtjoahkkáj vaj ájmon bisoduvvi aj boahtte ájggáj.

Ienep diedojt láttakprosjevta birra lågå dánna: Prosjevta birra Tjoaggem, bájkenamá, giella ja subttsasa