Stuorradikkeájras la dán jagásj hoalle Árranin

Siv Mossleth (Gb) le Stuorradikkeájras Guovdásjbelludagás. Sån la Sálatvuomes, valla suv iednebiele máddo l julevsáme guovlos.
Mossleth la Vuonarijka delegásjåvnå jådediddje OSSE PA:an (Organisasjonen for sikkerhet og samarbeid i Europa).
Mossleth la båndorin barggam dallutjis gå lij 22 jage vuoras. Sån la tjállám girjev «Bygdeutviklere i Nordland», kursajt ásadam nissunijda gudi aktijvalattjat ájggu demokrátijaj sæbrrat, ásadam åvddånahttemprográmmav nissunijda, ásadam Yess-kongressajt, doajmmam prosæssabagádallen KS:a åvdås (Kommunenes Landsforbund) ja álmmukválljidum ájrrasijt åhpadam, ja jådedam prosjevtav Sjønstå sijda åvddånahttemis.

Mosslethan li læhkám moadda politihkalasj ámmáda, duola degu Sálatvuome suohkanstivraájras 1999 jage rájes, sadjásasj suohkanoajvve, jådedam Gb fylkasuohkanjuohkusav, jådedam Gassko Nordlánda nasjonalpárkkastivrav ja aj jådedam Nordlánda urudisháldadime nammadusáv.