Árrana ådå dåbddågåvos ja grafihkalasj hábme

Árrana stivrra mierredij ådå dåbddågåvvusav ja ådå grafihkalasj hámev vuoratjismáno 4.-5. b. jagen 2016 ja jut dát ådå gåvos ja grafihkalasj hábme galggá almoduvvat sæmmi båttå gå ådå næhttabiele. Dát ådå grafihkalasj dåbddåhábme galggá aneduvvat juohkka almoduvvat buktagijn. Hábbmimbagádusá birra le vuollelin tjáleduvvam. Logo/dåbddåhábme .eps-formahtan prienntidusájda sáddiduvvá diŋŋguma baktu.

20.04.201712:50 Martin Rimpi

Dåbddågåvos le åvddånahteduvvam grafihkkáris Laila Lovise Johansen, Seria AS aktisattjat Martin Rimpi;ijn Árranis ja le vuododuvvam  ájádusvuodos mav siv.ark Ole Henrik Einejord le åvddånbuktám. 

Vuodooase dåbddågåvvusin li viettjaduvvam dájs:

Oktogon (gávtsetjiegak hábme:

- gåvvit oajvvetsiekkadusáv arkitektonalasj gåvån gå badjelis vuojná. 

- gåvvit sáme gáktsa ájggejabijt

- gåvvit árranav – dållåsajev mij dán aktijvuodan le gáktsa gierge

Rombe/paralellogram (njieljetjiegak man badjegiehtje le vuolus):

- sáme gåvvusa biejves jali almegoahke goabddásin

- Gåvvi aj árranav-  dållåsajev.

- gåvvit lieggavuodav, sjaddamav ja åvddånahttemav. Rombev máhtá aj gæhttjat dagu álkkes gåvådus dållåhámes. 

- aktisasjvuodav gåvvi; mij viessop avta biejve ja alme vuolen.

Jæbddabielak gålmåtjiegak:

- gåvvit låvddagoade hámev ja Árrana oajvvetsiekkadusáv gå ednamis gehtja. 

- gåvvit Ájlis gålmaktesvuodav mij gåvvit Árrana ulmmeparagráffa risstalasjvuoda vieledimev. 

Dåbddågåvos le giehtatjuorgaduvvam organalasj hábme ja gåvvusa li arvusmahtedum girrjemijs duojen ja gåvvusijs goabddán. Dáv dalága vuojná ja vuoset dát le "sáme" dåbddågåvos. Ietján de dåbddågåvos máhtá vuojnnet muhtem dábegis sáme tsiekkadusdábijn muoras, mársso (majna ájvijt suvddá) ja kávvil (gårvvudahka) mij vuoset merrasámij dábijda. 

Dåbddågåvos gåvvit Árranav tjåhkanimsadjen gávtse jahkejabijn gájkajda juohkka almeguovlos aktisasj berustimij julevsáme histåvrås, gielas, kultuvras ja árbbedábijs ma galggi åvddånahteduvvat ja giedjegahttet. 

Dåbddågåvos gávnnu guhka ja gåbdudak hámijn ja ja máhttá aneduvvat ájnegis gåvvusin guovdátja tjhalmostimen buojkulvissaj hervajn, avvemájdijn, glásajn jali ietjá buktagijn ma máhtti guovdátjin vuobdeduvvat.  

Ájádus le jut dåbddågåvvusav máhttá adnet stuorra gåvåjn avdedittjat ja tjalmostittjat julevsáme duojev ja kultuvra åvddånbuktemijt. Buojkulvissan konferánsamáppajn. 

Dåbddågåvvusa bájno li sámeslávgás ja julevsáme gáptes. Dá máhtti aneduvvat sierralágásj dættoj/transparency:ajn.

, click to open in lightbox