Giellaguovdátja birra
Árranin le åvdåsvásstádus dåjmadit giellaguovdátjav julevsáme guovlon. Julevsámegiella l guovdásj árvvo Árranij ja ulmme l åvddånahttet, nannit ja viehkedit jut giella gullu ja vuojnnusij boahtá julevsáme giellaguovlon Vuonan.
Sáme giellaguovdátja li ájnas oassevállde bargon gå galggá nannit ja åvddånahttet bájkálasj sámegielav. Giellaguovdátja barggo l viehket jut giella vuojnnusij boahtá, ja dåjmadit gávnadimsajijt ja arenájt gånnå giella gullu.
Árranin le åvdåsvásstádus dåjmadit giellaguovdátjav julevsáme guovlon. Sámedigge ruhtat dåjmav 1 virgálattjajn. Julevsámegiella l guovdásj árvvo Árranij ja ulmme l åvddånahttet sámegielav vaj sjaddá oajvvegiellan institusjåvnån.
Árran giellaguovdátja ulmme l ...
- dåjmadit giellaguovdátjav julevsáme guovlon.
- viehkedit bisodittjat ja nannit julevsáme gielav ja kultuvrav
- viehkedit vaj sámegiella gullu ja vuojnnu giellaguovdátja doajmmaguovlon
- viehkedit ienedit aktisasjbargov ja giellaværmádagáv giella hárráj.
- rahtjalis liehket nav vaj giela gaskostimen lassán, ja duodden lasedit anov girjálasjvuodan ja almodusájn.
- åvdåsvásstádusáv válldet sisŋeldis ja ålgoldis giellaåhpadimes.
- dahkat addnijguoradallamijt vaj nanostuhttet dåjmajt giellaaddnij dárboj milta.
- tjadádit duov dáv giellaprosjevtav ja dahkat ådå giellaranájt.
- fállat ja vuobddet duov dáv gielladievnastusáv.
