Guovdátja 25-jage ávvudallamijda sihtá vuododusá stivrra vijddábut Árranav åvddånahttet fábmogis guovdátjin julevsáme kultuvrraj, æládus- ja sebrudakiellemij.
Dát galggá guovte oajvveájggomusá baktu:
- Kvalitiehtav låpptit ja sihkarasstet dajn bargojn majt vuododus dahká, ja daj dievnastusáj milta majt fálli, ja aj gå vuododusá árvojt háldadi. Dát galggá tjadáduvvat prográmma baktu mij tjalmostahttá gåktu mij guovdátjin barggap.
- Láhtjet dilev nav vaj åvddålij guovlloj guovdátja dåjmajt ja máhtukvuodav åvddånahttá tsiekkadusá åbddima ja stuoredime baktu, dsj. fysihkalasj ålgoldisævtojt tjalmostahttet.
Árran dåjmaj rievddadusá aneduvvá sisŋeldisoassen badjásasj prográmmas "Árran 2020 jahkáj". Dát le ådå "Ájggomusá" vuodo milta ja oassen direktøra bæjvásasj bargos buorep barggoorganiserimijn.
Dát sihtá javllat jut gålmmå sissŋálasj prosessa li avtabále doajmmamin "Árran 2020 jahkáj" prográmmas:
- Kvalitiehtaprográmma.
- Tsiekkadusprográmma.
- Organisásjåvnnå- (OÅ-) prográmma.
Dáj oasseprográmmajs tjuovvu sierra prosjevta, ma li juogu ålggolis jali sissŋálattjat ruhtaduvvam.
Árrana stivrra prográmmajt stivrri ja oadtju rappårtajt juohkka oasseprográmmajs juohkka stivrratjåhkanimijn. Prográmma stivrriduvvi tjohkkáj dagu muodugasj prosjevta ja hiebaduvvam PRINCE2-vuohke aneduvvá juohkka ájnna prosjevtan. Galggá aj ájggomus mierreduvvat badjásasj prográmmaj ”poasstakårttå boahtteájggáj” milta.